Vutu geometrie matematiche
Logaritmi sezioni auree
Númari pari dispari decimali
Quàntici transfiniti pigreco?
Vutu dei númari imaginari
Dati da le radice d’ordine pari
Dei númari negativi
O (solo par ti) dó piú dó fa quatro?
(Ernesto Calzavara - Númari)
Dó più dó farà anca cuàtro, ma par mi 1 + 1 = 28.
Ventòto.
Ventòto xé un númaro pari: come mi e ti.
Xé anca un númaro composto con 6
divisori: 1, che són mi; dó che sémo sempre mi e ti; 4 parché dó più dó fa cuàtro; e po anca 7, 14, e 28 e questo non
so dirte parchè.
E se ti
sommi 1+2+4+7+14 el númaro che vien fóra xé 28 che, quindi, xé un númaro perfèto. Come perfetto xé el tó bunìgolo, che el me piàxe carésar.
E te digo anca che, dopo el 6 e prima del 496, el duodetriginta xé el secondo numero perfetto e, quindi, pensa amór quanti altri númari strologhi che ghe xé, prima de trovar una otra perfección compàgna a la tua.
Però a
‘sta malòrsega de 28 no ghé basta èsar perfèto, el ga caro èsar anca semiperfèto (parchè xé pari a la somma de calchedùn dei só divisori),
come xé semiperfèta e difettata la memoria mia quando te penso (e te penso tanto).
E
ancora, te digo, che ventòto xé el sètimo númaro triangolare, el quarto númaro esagonale y el tèrso númaro ennagonale centrato. E,
òstrega, mi no so còsa vuole dire ‘sta roba qua, che xé come le parole tue de notte, che no
capisso mai e me par arabo.
Ventòto fa anca la somma dei primi cinque
númari primi: 2 + 3 + 5 + 7 + 11 = 28.
Che par mi i xé i primi dó, 3, 5, sète e óndexe minuti che ghe go messo a inamoràrme de ti.
E i scrive anca che 28 xé un númaro
idoneo (ma mi no credo che par mi e ti 28 xé idoneo) e che xé el anello pi
longo dei númari socievoli. E mi con questo son d’accordo, parchè - quando son con ti - son socievole con tutto el mondo e smetto de
volerghe dar fógo.
E
ancora credéme se te digo che 28 fa parte delle terne pitagoriche, dei númari
de Keith, de Ulam e pure del Triangolo di Pascal, che quando no scriveva de
númari scriveva che le cœur a ses raisons que la raison ne connaît
point (e questa me
pare una gran monata). E anca el bon Fibonacci ga dito la sua su ‘sto númaro
qua, che i ga scoperto che xé el númaro atomico del nichel e un númaro magico
de la fisica nucleare. E son d’accordo, ciò!, parchè co ti la fisica se fa
magia e va anca oltre…xé metafisica, xé poesia.
E
‘ncora 28 xé un nùmaro felice (come felice xé el
sorriso tuo e felice son mi quando te vardo), xé un númaro pratico, congruente y, en fin (e questo me fa un mal boia), xé un númaro odioso. Come xé odiosa la
distanza de anni (ventòto!) che me separa da ti e che me fa sentir un freddo bisso, le
osa rote e me spacca el còr en tanti tocheti, che conta che riconta vien sempre ventòto (‘sto bastardo).
